Қауымдастықтың өкілі сайланды
Аудандық Мәдениет үйінің «Коворкинг» орталығында «Дүниежүзі қазақтарының қауымдастығы» республикалық қоғамдық бірлестігінің Мойынқұм, Шу аудандарының басшысы, медиатор Нұрбол Баймбетовтың ұйымдастыруымен «Медиация Заңы – орындалған ата-баба арманы» атты дөңгелек үстел өтті. Жиынға аудандық ардагерлер, қоғамдық кеңестердің төрағалары Жамбыл Қалыбаев, Болат Сатыбалдиев, аудандық соттың төрағасы Бабырхан Абуев, аудан әкімдігінің ішкі саясат бөлімінің басшысы Жанар Несіпбаева, аудандық мешіттің имамы Рысбай Еспенбетов, аудандық аумақтық сайлау комиссиясының төрағасы Сержан Садуақасов, орталық кітапхана меңгерушісі Ғалия Шубаева мен кітапхана қызметкерлері және БАҚ өкілдері қатысты.
Басқосуды медиатор Нұрлан Молдақұлұлы ашып, жүргізіп отырды. Ол өз сөзінде өзін қауымдастықтың Мойынқұм, Шу аудандарының басшысы екенін таныстырып, дүниежүзі қазақтарының қауымдастығының атқаратын жұмыстарының мақсаты мен негізгі міндеттеріне тоқталып өтті. Сондай-ақ бұл маңызды міндеттер мен мақсаттарды негізге ала отырып, құрылған жоспар аясында ауданда іс-шаралар ұйымдастырылу керектігін алға тартты. Ол үшін бұл жұмыстарды ұйымдастырып, жүргізетін ауданымыздан қауымдастықтың өкілін сайлап алу керек – деді ол.
Жиында аудандық ардагерлер, қоғамдық кеңестердің төрағалары Ж.Қалыбаев, Б.Сатыбалдиевтер сөз алып, дүниежүзі қазақтарының қауымдастығы – бұл халық үшін өте қажетті ұйым екенін тілге тиек етіп, аталмыш ұйым жұмысының жандана түсуіне қашанда қолдау білдіретіндерін жеткізді. Ал соттың төрағасы Б.Абуев қазақтың ұлттық салт-дәстүрі мен өнерін жаңғырту, жастарға ұлттық мүдде, елдік бірлік төңірегінде іс-шараларды жиі ұйымдастыру керектігін сөз етті.
– Бізге осындай қоғамдық ұйымның берер құнды дүниесі мол деп ойлаймын. Сондай-ақ әр адам өзінің қоғамдық санасын жақсы жағынан жаңғыртып, ойын түзеп, көбінесе жақсы ой, жағымды жаңалықтарды көп көруі керек. Қысқасы ұлттық идеологияны дамытуымыз керек, – деп аудандағы билер кеңесінің жұмыстары жайында және медиация заңы аясында орамды ойлары мен ұтымды ұсынысын білдірді.
Дөңгелек үстелге қатысушылар дүние жүзі қазақтары қауымдастығының жұмысын қашанда қолдайтындарын айтып, қауымдастықтың ауданымыздағы өкілі қызметіне аудандық Сайлау комиссиясының төрағасын Сержан Садуақсов сайланды. Басқосуды медиатор Нұрбол Баймбетов қорытындылады.