Асқар Мырзахметов жамбылдық жас ғалым Исаак Мустопуломен кездесті

Өзінің жастығына қарамастан тараздық талантты жас Исаак Мустопуло ғарышқа ұшу үшін баламалы энергия көздерін алу жолын зерттеп, өзіндік теориясын жасап шыққан. Ғылым жолында ізденіп жүрген ол Лондонда әлемге әйгілі физик Стивен Хокингпен кездескен.

Жас ғалым осы уақытқа дейін мүмкіндігі шектеулі адамдарға арналған STEM инновациялары ұлттық конкурсының лауреаты атанып үлгерген. Сондай-ақ өткен жылдың қараша айында Корея елінде өткен Ақпараттық технологиялар байқауында үздік деп танылып, жеңіске жеткен. Айта кетерлігі, аталған байқауға әлемнің 23 елінің өкілдері қатысқан болатын.

Бүгін облыс әкімі Асқар Мырзахметов дарынды жаспен арнайы кездесті. Асқар Исабекұлымен кездесуге 17 жасар ғалым өзінің анасы Майра Талғатқызымен бірге келді. Ерекше қабілетті жасөспіріммен әңгіме барысында көптеген сұрақтар талқыланып, ұсыныстары тыңдалды.

— Бүгінде біздің қоғамда мүмкіндігі шектеулі адамдарға барынша жағдай жасалуда. Әрине, бұл қуаңарлық жағдай. Шындығында, әлемдегі сан-сала қарқынды даму үстінде. Мұндай үдерістен Тараз қаласы да қалыс қалмай, оң өзгерістер болып жатыр, — деді И. Мустопуло.

Айта кетейік, бүгінде аймақта 166 балабақша мен 331 мектепте инклюзивті білім беруді дамытуға барлық мүмкіндіктер қарастырылған. Ол білім ордаларында пандустар, тұтқалар, кең есіктер, демалыс бұрыштары, тактильді жолдар және дене мүмкіндіктері шектеулі адамдар үшін басқа да қолайлы жағдайлар жасалған. Бұдан өзге 46 орта және арнаулы оқу орындарының 20-ында ерекше білім беру қажеттіліктері бар студенттердің еш кедергісіз білім алуы қамтамасыз етілген.

Өз кезегінде аймақ басшысы Исаактың шектеулі физикалық мүмкіндіктері арман жолында кедергі болмайтынын дәлелдейтін адамның жарқын үлгісі болып табылатынын атап өтті. Ал оның ғылымға қызығушылығы басқа да жас ғалымдардың ғылым саласында ары қарайда ізденіп, елдің дамуына ықпал ете алады. Шындығында, бүгінде біздің қоғамға табысты идеяларды қалыптастыра алатын креативті ойлаушы жастар қажет-ақ. Өз кезегінде Асқар Мырзахметов жақында ашылған Ш.Мұртаза атындағы «Руханият және тарихтану» орталығы ғылым жолындағы ізденетін жастар үшін үйірме немесе клуб ұйымдастыру туралы ұсынысын жеткізді. Онда жастар өз идеяларын мақсатты жүзеге асыра алатын, тек қана ғылымды ғана емес, сонымен қатар мәдениетті дамыту, жас ұрпақ арасында рухани құндылықтарды насихаттау мәселелері бойынша пікір алмасып, талқылауға зор мүмкіндік алмақ. Сондай-ақ аталған орталықта біздің облысты мекендейтін этностардың бай мәдени мұрасына талдау жасап, жүйелеу жолында мақсатты жұмыстар атқаратын болады. Тағы бір маңызды міндет – жастар арасында осы байлықты танымал ету жүйесін әзірлеу, барынша мүмкін болатын тәрбиелік әсерге қол жеткізу.

Исаак бұл бастаманы қуана қолдайтынын білдірді. Себебі, ол өз мектебінің қабырғасында осындай нәрсе ұйымдастыруға тырысып жүр екен. «Егер клубты облыс көлемінде ұйымдастыратын болса, онда жастар үшін кең перспективаларға жол ашылатын болады», — деген жас ғалым қуанышын жасыра алмады. Кездесу соңында облыс әкімі Исаак Мустопулоны Жамбыл облысының тарихы топтастырылған фотоальбом сыйлап, оған зор денсаулық және ірі ғылыми жетістіктер тіледі.

Жамбыл облысы әкімінің баспасөз қызметі