Ардагерлер үйінде
Жайында жай отырмайтын ардагерлердің мереке күндері де қарап отыра алмайтыны анық. Араларында қоғамдық жұмысқа белсене араласатыны, бір мезгіл спортпен шұғылданатындары да бар.
Күні кеше ғана атап өткен Қазақстан Республикасының Тұңғыш Президенті күні мерекесіне орай аудандық ардагерлер кеңесінің төрағасы Бақыт Сырлыбаевтың ұйымдастыруымен ардагерлер арасында бильярд ойынынан жарыс өтті.
Жарысқа сегіз ардагер қатысып, шеберлік танытты. Қорытындысында, кейінгі буын өкілдеріне үлгі көрсете білген аудандық ардагерлер кеңесінің мүшесі Сәрсембай Күзербаев бірінші орынды иеленсе, екінші орын зейнеткер Тілеухан Маршовқа тиді. Үшінші тұғырдан қоғам белсендісі, зейнеткер Әзіреталы Садралиев көрінді. Ынталандыру жүлдесі аудандық ардагерлер кеңесінің алқа мүшесі Сайлаубек Ережепбаевқа бұйырды.
Соңында Бақыт Уәлиұлы жеңімпаз бен жүлдегерлерге бағалы сыйлықтар тапсырды.
Әр мереке сайын ұйымдастырылатын шараларға қатысу ардагерлер арасында дәстүрге айналғандай. Өйткені, аудандық ардагерлер үйінің есігі әрбір ардагер үшін айқара ашық.