Ауыл инфрақұрылымы, кәсіпкерлік және цифрлық даму: «Әділет» кандидаттары Жуалы ауданының тұрғындарымен кездесті

Ауылдың әлеуетін арттыру, тұрғындарға қолайлы жағдай жасау және жаңа мүмкіндіктерге жол ашу – өңірлік дамудың басты шарттары. Осы бағыттағы міндеттер Жуалы ауданының Талапты және Көлбастау ауылдарында өткен кездесулерде талқыланды. «Әділет» партиясының Жамбыл облыстық мәслихаты депутаттығына партиялық тізім бойынша ұсынылған кандидаттары Болатбек Уәлихан Болатбекұлы, Кадралиев Айбек Амансейітұлы және Қыдырбаев Бағлан Жарылқасынұлы тұрғындарға 2026–2031 жылдарға арналған «Әділетті болашақ үшін» өңірлік сайлауалды бағдарламасын таныстырып, ауыл инфрақұрылымы, кәсіпкерлік, ауыл шаруашылығы және цифрлық даму бағытындағы басымдықтарды ортаға салды.
Болатбек Уәлихан Болатбекұлы ауылдық елді мекендерді дамытуда жол, ауызсу, газ және коммуналдық желілердің қолжетімділігі шешуші рөл атқаратынын атап өтті. Оның айтуынша, инфрақұрылымдық мәселелерді жүйелі шешу ауыл тұрғындарының күнделікті тұрмысына тікелей әсер етеді.
«Ауылдың дамуын тек экономикалық көрсеткіштермен өлшеуге болмайды. Ең алдымен, тұрғындардың өмір сүру жағдайы жақсаруы керек. Адамдар сапалы жолмен жүріп, таза ауызсуға қол жеткізіп, үйлеріне табиғи газдың келуін күтеді. Сондықтан бұл мәселелер өңірлік бағдарламаның маңызды басымдықтары ретінде белгіленді. 2031 жылға дейін облыста 456,5 шақырым жол инфрақұрылымын жаңарту, жергілікті жолдардың нормативтік жағдайдағы үлесін 99 пайызға жеткізу жоспарланып отыр. Бұдан бөлек, 30 елді мекенді газдандыру және 1,2 мың шақырым су құбырын жаңғырту көзделген», — деді кандидат.
Кадралиев Айбек Амансейітұлы ауыл шаруашылығын дамыту, өнім өңдеу көлемін арттыру және шағын кәсіпкерлікке қолайлы жағдай жасау мәселелеріне назар аударды. Ол ауылдағы кәсіпкерлік бастамаларды қолдау жергілікті экономиканы нығайтудың және тұрақты жұмыс орындарын қалыптастырудың маңызды тетігі екенін жеткізді.
«Ауылда еңбек етуге де, кәсіп бастауға да мүмкіндік болуы қажет. Ол үшін шаруаларға қаржылық қолдау көрсетіліп, өндірген өнімін өңдеуге және өткізуге жағдай жасалуы керек. Өңірлік бағдарламада ауыл шаруашылығы саласында кемінде 30 жобаны іске асыру, «Ауыл аманаты» аясында 5,2 мың жеңілдетілген микрокредит алуға жәрдемдесу міндеті қойылған. Сонымен қатар ет өңдеу үлесін 49,9 пайызға, сүт өңдеу үлесін 54,8 пайызға дейін жеткізу жоспарланған. Бұл ауыл шаруашылығы өнімдерінің қосылған құнын арттырып, жергілікті кәсіпкерлердің мүмкіндігін кеңейтуге ықпал етеді», — деп атап өтті ол.
Кандидат кәсіпкерлікті қолдау бағытында «Іскер аймақ» бағдарламасы аясында 514 жобаны қаржыландыруға ықпал ету көзделгенін де айтты. Бұл бастамалар ауылдық жерлерде жаңа өндірістер ашуға, шағын бизнесті дамытуға және халықтың табысын арттыруға бағытталған.
Қыдырбаев Бағлан Жарылқасынұлы ауылдық аумақтардың цифрлық инфрақұрылымын дамыту және жастардың заманауи білім мен технологияларға қолжетімділігін кеңейту мәселесін көтерді. Оның пікірінше, цифрлық теңсіздікті азайту ауыл мен қала тұрғындары арасындағы мүмкіндіктер алшақтығын қысқартуға жол ашады.
«Бүгінде интернет тек байланыс құралы емес, білім алудың, кәсіп жүргізудің және мемлекеттік қызметтерді пайдаланудың маңызды тетігіне айналды. Ауыл жастары да заманауи технологияларды меңгеріп, жаңа мамандықтарды игеруге мүмкіндік алуы керек. Осы мақсатта өңірлік бағдарламада 2031 жылға қарай ауылдық елді мекендерді интернетпен 100 пайыз қамту, 37 жаңа базалық станция орнату және аудан орталықтарында 10 IT-хаб ашу жоспарланған. Бұл бастамалар ауыл тұрғындарының цифрлық мүмкіндіктерін кеңейтіп, жастардың әлеуетін дамытуға бағытталған», — деді кандидат.
Кездесу барысында тұрғындар да ауылдардың тыныс-тіршілігіне қатысты өзекті мәселелерді ортаға салды. Жолдардың жағдайы, ауызсу жүйесінің сапасы, ауыл шаруашылығына қолдау көрсету, жұмыспен қамту және әлеуметтік инфрақұрылымды дамыту жөнінде сауалдар қойылды. Қатысушылар жергілікті мәселелерді шешуге қатысты ұсыныстарын жеткізді.
Кездесу қорытындысында ауыл тұрғындарының ұсыныстары мен пікірлері өңірлік сайлауалды бағдарламада белгіленген міндеттер аясында талқыланды. Тұрғындармен ашық диалог жалғасып, ауылдық аумақтарды дамытуға қатысты мәселелер партияның назарында болатыны айтылды.

Дайындаған: «Әділет» партиясы Жамбыл облыстық филиалының баспасөз қызметі.
Тапсырыс беруші: Д. А. Каипов.
Жамбыл облыстық мәслихаты депутаттарының сайлауында партиялық тізімді ұсынған «Әділет» партиясы» қоғамдық бірлестігінің сайлау қоры қаражатынан төленді.