Ел болашағы – дені сау ұрпақта

Құрылтай – қоғам мен мемлекет арасындағы байланысты нығайтып, ел өміріндегі маңызды мәселелерді ашық талқылауға мүмкіндік беретін қоғамдық алаң. Оның негізгі бағыттарының бірі – азаматтардың ұсыныстары мен пікірлерін ескеріп, қоғам үшін өзекті мәселелердің шешімін іздеу. Осы тұрғыдан алғанда, халық денсаулығын сақтау мен денсаулық сақтау жүйесін жетілдіру де Құрылтай назарындағы маңызды бағыттардың бірі болуға тиіс. Себебі ұлттың әл-ауқаты мен елдің тұрақты дамуы халықтың денсаулығымен тығыз байланысты.
Медицина саласына қатысты мәселелердің ауқымы кең. Медициналық көмектің сапасы мен қолжетімділігі, ауылдық жерлердегі мамандар тапшылығы, дәрігерлердің еңбек жағдайы, медициналық білім мен ғылымды дамыту, заманауи технологияларды енгізу – қоғам үшін маңызы зор бағыттар. Әсіресе қала мен ауыл тұрғындарына көрсетілетін медициналық қызметтің мүмкіндігін теңестіру – назар аударуды қажет ететін мәселе. Мұндай түйткілдерді ортаға салып, түрлі ұсыныстарды талқылау арқылы нақты шешімдерге жол ашуға болады.
Бүгінгі медицина ғылым мен технологияның қарқынды дамуына байланысты жаңа мүмкіндіктерге ие болып отыр. Заманауи диагностикалық әдістер, цифрлық технологиялар, жаңа емдеу тәсілдері ауруды ерте анықтап, медициналық көмектің тиімділігін арттыруға мүмкіндік береді. Мұндай өзгерістер жас мамандардан үнемі ізденуді, білімін жетілдіруді және жаңа технологияларды меңгеруді талап етеді. Ғылымға ұмтылған, кәсіби білімі терең әрі жауапкершілігі жоғары мамандардың көбеюі – денсаулық сақтау саласының сапалы дамуына негіз болады.
Менің ойымша, Құрылтайдың қоғамдық маңызы да осында – ел үшін маңызды мәселелерді бір ортаға жинап, ортақ пікір қалыптастыру және тиімді шешімдерге бастама жасау. Халық денсаулығы баршаға ортақ құндылық болғандықтан, бұл бағыттағы ұсыныстар мен бастамалардың қоғам тарапынан қолдау табуы маңызды. Дені сау азамат – еңбекке қабілетті қоғамның, ал дені сау ұрпақ – елдің жарқын болашағының негізі. Сондықтан медицина саласына жасалған әрбір қолдау мен оның дамуына бағытталған әрбір қадамды мемлекет пен қоғамның ортақ игілігіне қосылған үлес деп бағалауға болады.

Сейтхан ЖОШЫБАЕВ, 
кардиолог ғалым. Медицина ғылымдарының докторы, профессор.
Тараз қаласының Құрметті азаматы