Сақшылар қайырымдылық жасады
Елімізде бесінші рет аталып өтілген 1-наурыз Алғыс айту күнінде сондай-ақ Еріктілер жылы аясында біраз игі істер атқарылып жатқаны белгілі. Осындай қайырымды шараға үлес қосқан Жамбыл облысы бойынша ҚАЖ департаментіне қарасты ЖД-158/1 мекемесінің қызметкерлерін айрықша айтуға болады.
Әділет подполковнигі Бауыржан Сауранбаев басқаратын сақшылар қаражат жинап, облыс орталықтарында тұратын әлеуметтік жағдайы төмен бірнеше жанұяға азық-түлік, күнделікті тұрмыста қажет заттар жеткізілді.
— Алғыс айту күніне және Еріктілер жылына орай біздің мекеме қызметкерлері облыс орталығындағы көпбалалы 2 отбасыға қажетті азық-түлік өнімдерін жеткізіп берді. Игілігі мол мұндай іс-шаралар алдағы уақытта да өз жалғасын табатын болады, — деді мекеме бастығының тәрбие жұмыстары жөніндегі орынбасары Нұржан Күтімбетов.
Әрине, қоғамдық тыныштықтың күзетшісіне айналған тәртіп сақшыларының қолдан келгенше қайырымдылық жасауы — сауапты іс. Оның үстіне, жағдайы төмен отбасыларға көмек көрсету қашанда құрметке лайық. Бастысы, отбасы мүшелерінің шын жүректен айтқан алғысы емес пе?!
Құндыз Ахашева,
ЖД-158/1 мекемесінің психологы