Оңғар Назерке Сайлауқызы — "Munaranews"
A place where you need to follow for what happening in world cup

Оңғар Назерке Сайлауқызы

19

Оңғар Назерке Сайлауқызы 1994 жылы 4 қазанда Жамбыл облысы, Талас ауданы, Ойық ауылында дүниеге келген. 2000-2012 жылдары Ойық ауылы, Көктөбе бөлімшесіндегі Б.Әлменұлы атындағы орта мектепте оқып, білім алған.

2012 жылы М.Х. Дулати атындағы ТарМУ-дің «Журналистика» мамандығына грантқа түсіп, оны 2016 жылы тәмамдады. Мектеп және студенттік жылдары өлеңдері мен мақалалары облыстық, аудандық басылымдарда жарық көріп, 2012 жылғы көктемде «Абай оқулары» байқауының «Өз шығармашылығы» номинациясы бойынша жүлдегер атанды. Сондай-ақ көркем сөз оқу шеберлері байқауларының жүлдегері атанып, өлеңдері «Елін сүйген, елі сүйген Елбасы», «Өрімтал» сияқты жас ақындардың жыр жинақтарына енді. «Өмір дедім», «Арман айым», «Сағындым сені…», «Сен қайта оралғанда…», «Мәжнүнің болсам, Ләйлімсің» т.б. өлеңдеріне әндер жазылған. Атап айтқанда, «Өмір дедім» өлеңіне жазылған Серік Керімбековтің әні Астана қаласында өткен EXPO-2017 халықаралық көрмесінде Жамбыл облысының мәдениет күндерінде орындалды.

Еңбек жолын студент кезінен бастап, облыстық «Қазақстан-Тараз» телерадиокорпорациясында («Балдәурен», «Керек-дерек», «Жазушы шығармашылығынан», «Атадан қалған асыл сөз», т.б.) түрлі хабарлар жүргізді. 2016-2018 жылдары «Алашинформ» қазақ ақпараттық агенттігінің және «Тағылым» журналының Тараз қаласындағы меншікті тілшісі, сондай-ақ «QAZAQ BILIMI» журналының бас редакторы болды. Қазіргі таңда Жамбыл облысы Қазақстан халқы ассамблеясы «Қоғамдық келісім» КММ баспасөз қызметі бөлімінің БАҚ-пен жұмыс жөніндегі менеджері қызметін атқаруда.


Сен қайта оралғанда…

 

Сен қайта оралғанда…

Бəріде кеш болады, кеш күнім.

Көз алдымнан жоғалады кескінің.

Өр кеудеңнен құс боп ұшып кетермін,

Естелік боп қала берсін ескі мұң.

 

Сен қайта оралғанда…

Ұқсарсың күзгі бақтай тоналғанға.

Санамнан сендік ойлар жоғалғанда,

Сабырым жеңіп кетер сезімімді,

Жалғыз куə болады оған да Алла.

 

Сен қайта оралғанда…

Алданып қаласың-ау жоқ арманға.

Мен де жоқ, жүрек те жоқ сонау маңда,

Сен жалғыз қаларсың-ау күңіреніп,

Мен жалғыз болашаққа жол алғанда.

 

Сен қайта оралғанда…

Бекінем саған қайта оралмауға.

Серт етем тіпті тірі санамауға!

Келме жəне аққулар қонар маңға.

Сен мені күтпе де енді келеді деп,

Болмайтын бос үмітке жоқ алданба.


Өзіңді іздеу

 

Мен, Өзімнен кешірім сұраймын…

 

Сен ғарыштан келдің бе, ғаламаттан,

Онда жүрек көрдің бе жараланған.

Жараланған һәм көпке табаланған,

Жаралғандай өң өзі жалаң оттан.

 

Сен арманнан келдің бе, аппақ нұрдан,

Періштедей ару бартын жаны жырдан

Құшағына толтырған қызыл гүлін,

Қу тірліктің құрсауына қылған құрбан.

 

Сен көктемнен келдің бе, күліп тұрған,

Айтқызбай-ақ сырымды біліп тұрған.

Көре алмай көзімнің сығым жасын

Сирен гүлмен сүртетін мүлгіп тұрған.

 

Сен Тәңірден келдің бе, теңдесі жоқ,

Шын құлшылық жасарға бермесі жоқ.

Көрмедің бе көзіндері отты қызды,

Қадамы нық, мінезі тік, сөздері оқ.

 

Таппадым ба, таптым ба білмей бұл күн,

Өзімді іздеп, сүлдерімді сүйрей жүрмін.

Іздеу салам, көңілі наз, ерке қызға.

Арамдықты, араздықты білмей тұғын.

Пікір қалдыру

Your email address will not be published.