Құқық бұзушылықтың алдын алу – басты міндет

Жамбыл облысы бойынша ҚАЖ департаментіне қарасты №67 мекемесінің ұйымдастыруымен Тараз қаласындағы Парасат колледжі студенттерімен құқық бұзушылықтардың алдын алу бағытында телемост форматында профилактикалық кездесу өткізілді.
Іс-шараның негізгі мақсаты – жастар арасында құқықтық сауаттылықты арттыру, заң талаптарын құрметтеуге тәрбиелеу, құқық бұзушылықтың алдын алу және қоғамдағы тәртіп пен жауапкершілік қағидаларын түсіндіру болды.
Телемост барысында мекеме қызметкерлері қазіргі таңда жасөспірімдер арасында жиі кездесетін құқық бұзушылық түрлеріне тоқталып, олардың қоғамға және жеке тұлғаға тигізетін кері әсерін жан-жақты түсіндірді. Сонымен қатар, кәмелетке толмағандар арасындағы тәртіп бұзушылық, буллинг, интернет желісіндегі қауіпсіздік, зиянды әдеттердің алдын алу және заң алдындағы жауапкершілік мәселелері кеңінен айтылды.
Кездесу барысында студенттерге құқық бұзушылықтың салдары, азаматтық жауапкершілік, қоғамдық тәртіпті сақтау және салауатты өмір салтын ұстанудың маңыздылығы жөнінде түсіндірме жұмыстары жүргізілді. Мекеме қызметкерлері жастарды білім алуға, қоғамға пайдалы азамат болуға және заң талаптарын қатаң сақтауға шақырды.
Сонымен қатар, телемост кезінде студенттер өздерін қызықтырған сұрақтарын қойып, құқықтық тақырыптар бойынша жан-жақты жауаптар алды. Ашық форматта өткен шара қатысушылар арасында еркін пікір алмасуға мүмкіндік берді.
Осындай профилактикалық және тәрбиелік бағыттағы іс-шаралар жастардың құқықтық мәдениетін қалыптастыруға, құқық бұзушылықтың алдын алуға және жасөспірімдердің саналы азамат болып қалыптасуына оң ықпал етеді.
Шара соңында қатысушылар ұйымдастырылған телемосттың маңыздылығын атап өтіп, мұндай кездесулердің алдағы уақытта да жалғасуы қажет екенін жеткізді.