Жамбыл облысында референдум қорытындылары талқыланды

Тараз қаласында Қазақстан Халық партиясы Жамбыл облыстық филиалының ұйымдастыруымен «Болашақты бірге құрамыз: референдум қорытындылары және алдағы қадамдар» тақырыбында қоғамдық-сараптамалық кездесу өтті.
Іс-шараны ҚХП Жамбыл облыстық филиалының төрағасы Р.С. Аққозиев ашып, қатысушыларды күн тәртібіндегі маңызды мәселелермен таныстырды. Ол өз сөзінде референдумның ел дамуы үшін стратегиялық маңызға ие екенін атап өтіп, қоғамның белсенді қатысуы – оң өзгерістердің басты кепілі екенін жеткізді.
Кездесуге мемлекеттік органдардың өкілдері, бизнес қауымдастығы, білім беру саласының мамандары, қоғамдық ұйым мүшелері мен сарапшылар қатысты. Жиын ашық пікір алмасу форматында өтіп, қатысушылар өз ойларын ортаға салып, ұсыныстарын білдірді.
Негізгі талқыланған мәселелер:
– референдум нәтижелерінің мазмұны мен олардың практикалық маңызы;
– қабылданған шешімдердің өңірлік деңгейде жүзеге асырылу тетіктері;
– Жамбыл облысын дамытуға бағытталған нақты бастамалар;
– қоғамның түрлі салалары арасындағы өзара ынтымақтастықты күшейту.
Кездесу барысында қатысушылар референдум қорытындылары ел дамуының жаңа кезеңіне жол ашатынын атап өтті. Сонымен қатар, өңірдегі әлеуметтік-экономикалық мәселелерді шешуде бірлескен жұмыстың маңыздылығы ерекше айтылды.
Жиын қорытындысында алдағы уақытта жүзеге асырылатын бірқатар ұсыныстар мен бастамалар талқыланып, оларды кезең-кезеңімен іске асыру қажеттігі белгіленді.
Аталған кездесу түрлі сала өкілдерінің басын қосып, сындарлы диалог алаңына айналды. Мұндай форматтағы іс-шаралар қоғам мен билік арасындағы байланысты нығайтып, өңірдің тұрақты дамуына серпін беретіні сөзсіз.