Парадан бас тартқан жамбылдық полицейге қаржылай сыйақы берілді

Жемқорлыққа жол бермей, пара алудан бас тартқан Жамбылдық полицей марапатталды.

Адал тәртіп сақшысын ҚР Сыбайлас жемқорлыққа қарсы іс-қимыл агенттігінің өкілі Арман Бердалин арнайы құттықтап, қызметіне адалдық танытқаны үшін алғыс білдірді. Ұсынылған «ауызбастырықтан» бас тартқан – полиция майоры Ильяс Алашов.

Агенттік өкілі полиция қызметкеріне арнайы диплом мен қаржылай 30 АЕК, яғни 79 мың теңге сыйақы табыстады.

Марапаттау рәсімі Қазақстан Республикасы Сыбайлас жемқорлыққа қарсы агенттігінің үгіт-насихат штабы өкілдері мен Жамбыл облысы Полиция департаменті жеке құрамының кездесуі барысында өтті. Жиында сондай-ақ өз ісінің үздіктері департамент басшысының арнайы алғыс хатына ие болды.