Жаңа алаңда – жастар
Биылғы жылы «Жұмыспен қамтудың жол картасы -2020» бағдарламасы аясында ауданымызда бірнеше құрылыс жүргізілуде. Олардың қатарында 9 шағын жасанды футбол алаңшасы да бар. Бұған дейін аталған футбол алаңшаларының төртеуі салынып, пайдалануға берілсе, өткен аптада осындай қуаныш Айдарлы ауылында болды.
Ауылдағы шағын жасанды футбол алаңының ашылу салтанатына ауыл халқы көп жиналды. Олардың дені ауыл жастары болуы орынды-ақ.
Футбол алаңшасының ашылуында аудан әкімінің орынбасары Амангелді Нәметқұлов, еңбек ардагері, ауылдың Төбе биі Несіпбай Есілбаев, ауылшаруашылығы саласының ардагері, ауданның Құрметті азаматы Нұрғазы Әбдіразақовтар сөз алып, спорттың адам денсаулығына пайдасы жайлы айтып өтті. Сондай-ақ ауылға жастар үшін осындай шағын футбол алаңын соққызып бергені үшін аудан басшыларына алғыстарын жеткізді.
Жасанды футбол алаңының ашылу лентасын А.Нәметқұлов пен Н.Есілбаев қиды. Осыдан соң ауылдың екі жастар командасы жаңа алаңда алғашқы ойынды бастап кетті. Бұл күні бұл алаңдағы ойын ымырт үйірілгенше жалғасты.