Мемлекеттік тілдің сот жүйесіндегі қолданысы

Мемлекеттік тіл – елдің тәуелсіздігі мен ұлттық бірегейлігінің маңызды негіздерінің бірі. Қазақ тілінің қоғамдық өмірдің барлық саласында, соның ішінде сот жүйесінде кеңінен қолданылуы – мемлекеттік тіл мәртебесін нығайтудың маңызды бағыты.
Қазақстан Республикасының Конституциясына сәйкес, қазақ тілі – мемлекеттік тіл. Мемлекеттік тілдің сот төрелігін жүзеге асыру барысында қолданылуы азаматтардың сотқа жүгіну және өз құқықтары мен заңды мүдделерін қорғау мүмкіндіктерімен тікелей байланысты.
Сот жүйесінде мемлекеттік тілдің қолданылуы сот құжаттарын әзірлеумен ғана шектелмейді. Сот отырыстарын жүргізу, талап қою арыздарын, шағымдар мен өтініштерді қарау, сот актілерін шығару және іс жүргізу құжаттарын рәсімдеу барысында қазақ тілінің қолданылуы маңызды.
Сот ісін жүргізуде азаматтардың өз құқықтарын ана тілінде немесе өздері таңдаған тілде жүзеге асыруына заңмен белгіленген мүмкіндіктер қамтамасыз етіледі. Бұл ретте процеске қатысушылардың тілдік құқықтарын сақтау – сот төрелігінің ашықтығы мен қолжетімділігінің маңызды шарты.
Мемлекеттік тілдің сот жүйесінде кеңінен қолданылуы – ең алдымен, заң талаптарын сақтау және азаматтарға сапалы құқықтық қызмет көрсету мәселесі. Судьялар мен сот қызметкерлерінің қазақ тілін кәсіби деңгейде меңгеруі сот актілерінің сапасына, құқықтық терминологияның бірізді қолданылуына және сот төрелігінің қолжетімділігіне оң ықпал етеді.
Қазіргі таңда сот жүйесінде мемлекеттік тілді дамытуға, сот құжаттарының сапасын арттыруға және құқықтық терминологияны біріздендіруге ерекше көңіл бөлінуде. Бұл бағыттағы жұмыстар мемлекеттік тілдің мәртебесін көтерумен қатар, сот төрелігінің сапасын жетілдіруге де ықпал етеді.
Мемлекеттік тіл – баршаға ортақ құндылық. Оның сот жүйесінде кеңінен қолданылуы заң үстемдігін нығайтып, азаматтардың құқықтық мәдениетін арттыруға және мемлекеттік тілдің қоғамдағы беделін одан әрі көтеруге қызмет етеді.

Г.Кожантаева,
Жамбыл облысы мамандандырылған
ауданаралық әкімшілік сотының судьясы