Маңызды мәселелер қозғалды

Өткен бейсенбі күні Аса ауылдық округі әкімі аппаратында жергілікті қоғамдастық кеңесінің жиналысы өтті. Оған қатысқан кеңестің 11 мүшесі күн тәртібіне қойылған коронавирустық инфекцияның алдын алу бойынша округ аумағында атқарылып жатқан іс-шаралардың маңыздылығы және баспасөзге жазылу науқаны жайын кеңінен сөз еткен ауыл әкімі Бауыржан Қалшымбетовтің сөзін мұқият тыңдады. Сондай-ақ, басқосуда әртүрлі мәселелер де қозғалды.
– COVID-19 инфекциясының таралуына жол бермеу мақсатында халық көп шоғырланатын орындарға сақтық шаралары бойынша жадынамалар тарату, БАҚ-да жариялау жұмыстарын жандандыру керек. Халыққа бетпердемен жүруді әдетке айналдыру, әрбір азаматтың өзімен бірге антисептик құралын алып жүру, яғни сақтық шараларын орындау қажеттігін түсіндірген жөн. Бұл – бірінші мәселе.
Екінші мәселе туралы айтарым, 2021 жылдың бірінші жартысына баспасөзге жазылу науқаны басталғанын білесіздер. Сондықтан сіздерді аудандық, облыстық, республикалық газет-журналдарға жазылуға шақырамын, – деді ауыл әкімі Бауыржан Қалшымбетов.
Сөз алған жергілікті қоғамдастық кеңесінің төрағасы Рахымбек Жапаров, орынбасары Әзіреталы Садыралиев, кеңес мүшелері Сәрсенбек Шманов, Таңатар Сағындықов және округ әкімі аппараты жанындағы әйелдер кеңесінің төрайымы Аманкүл Орынтаева ауыл тазалығы, Аса-Тараз бағытында жүретін жолаушылар көлігінің жүру кестесіне өзгерту енгізу керектігін айтты.