Ардагерлер ауқымды мәселелер ұсынды
Күні кеше аудан әкімі Нұржан Календеров өңірдің ардақты ақсақалдарын қабылдап, ұсыныс-пікірлерін тыңдап, ой бөлісті. Ең әуелі қалалық ардагерлер ұйымы кеңесінің төрағасы Қуанышбек Қарғабаев Нұржан Сәбитұлын ауданға әкім болып тағайындалуымен құттықтап, алдағы жұмысына сәттілік тіледі.
Келесі кезекте аудандық ардагерлер ұйымы кеңесінің төрағасы Қазақбай Байжұманұлы сөз сөйлеп, ардагерлерді жеке-жеке таныстырды. Айта кету керек, ардагерлердің басым бөлігі өз заманында аудандағы маңызды салалардың тұтқасын ұстаған азаматтар. Алайда, олар ауданның әлеуметтік-экономикалық жағдайына бей-жай қарамай, әлі күнге дейін қолғабыс көрсетіп келеді. Өңірдегі түйіні тарқатылмаған түйткілдерді жауапты басшыларға жеткізуде, өздерінің ұтымды ұсыныстарын білдіруде ешқашан аянып қалған емес. Міне, дәл осы сабақтастық аталған басқосуда да жалғасын тапты. Кездесу барысында аудан ардагерлері өз ойларымен бөлісіп, бірқатар мәселелерді аудан әкімінің назарына ұсынды. Мәселен Қ.Байжұманұлының айтуынша, аудандық ақсақалдар алқасы мемлекеттен бір тиын алмаса да аудан тұрғындарына көмек көрсетуді үйреншікті үрдіске айналдырған. Қайырымдылықтан да қалыс қалған емес. Дәлірек айтар болсақ, аудан ардагерлері көгілдір отынды бес отбасыға тегін кіргізіп берсе, бірқатар тұрғындарға 50 және 30 пайыз жеңілдікпен орнатуға сеп болған.
Сонымен қатар, бастапқыда Мәдениет сарайы деп жоспарланып, кейіннен құрылыс жұмыстары тұралап қалған аудан орталығындағы нысанның мәселесі де сөз болды. Аталған мәселеге қатысты өз ойын білдірген аудан әкімі түйткілдің түйінін тарқатуға барын салатындығын жеткізді. Сондай-ақ, ауданда Аяз Бетбаев атындағы ақындар мектебін ашу туралы ұсыныс айтылып, ол аудан басшысы тарапынан қолдау тапты. Бұдан бөлек, төлебиліктердің бас ауруына айналаған газ мәселесі де аудан әкімінің назарына ұсынылды. Жиын соңында Нұржан Сәбитұлы ардагерлерге ризашылығын білдіріп, алдағы уақытта да бірлесе жұмыс атқаруға шақырды.
Ерғали АСХАТҰЛЫ.