«Ардагерлерді ардақтайық»: бір тағдырда тұтас дәуірдің ізі бар

92 жастағы тыл ардагері Валентина Бурованың балалық шағы соғыс жылдарымен тұспа-тұс келді. Үш сыныптан кейін оқуын жалғастыра алмады. Жастайынан еңбекке араласып, кейін өмір бойы асханада аспаз болып жұмыс істеді. Екі қызын да өз еңбегімен өсірді.

Бүгінде жалғыз тұратын Валентина апайдың үйіне «Әділет» жастары «Ардагерлерді ардақтайық» акциясы аясында барып, тұрмыстық қажеттіліктеріне көмектесті. Жастар үй шаруасына қолғабыс етіп қана қоймай, апайдың өмір жолын тыңдап, ақ батасын алды.

Валентина апайдың әңгімесін тыңдай отырып, оның өмірінде қанша сынақ болғанын аңғаруға болады. Ерте жастан еңбекке араласқан. Аяғы ауыр кезінде де жұмыс істеген. Сегіз айлық сәбиін бағып жүріп, асханада еңбек еткен күндері де болған.

Бүгінде ол сол жылдарды өкінішпен емес, сабырмен еске алады. Өмірден көргені көп. Сондықтан жастардың келгеніне, жағдайын сұрап, үйіне көмектескеніне ерекше қуанады.

«Мен өмір бойы еңбек еттім. Үш сыныптан кейін оқуды жалғастыра алмадым. Не жұмыс болса да істедім. Асханада аспаз болып, екі қызымды өсірдім. Аяғым ауыр кезде де, кішкентай балам бар кезде де жұмыс істедім. Өмірде қиындық көп болды. Бірақ балаларымды жеткізуім керек болды. Қазір жастардың келіп, жағдайымды сұрап жүргеніне ризамын. Үлкендерді ұмытпаса екен. Біздің көргенімізді, айтқанымызды жастар білсе екен», — дейді 92 жастағы тыл ардагері Валентина Бурова.

Валентина апайдың өмірі – тылда еңбек еткен әйелдердің талайына ортақ тағдыр. Соғыс жылдарында майданға кеткендердің орнын жоқтатпай, ауылда қалған әйелдер мен балалар да елдің күнделікті тіршілігін ұстап тұрды. Бірі егін екті, бірі зауытта еңбек етті, бірі бала тәрбиелеп, отбасының қамын жасады.

Бүгін сол буынның өкілдері қартайып отыр. Сондықтан олардың әрқайсысының әңгімесін тыңдау – өткенді еске алу ғана емес, тарихты кейінгі ұрпаққа жеткізудің бір жолы.

Осы тұрғыдан алғанда, «Ардагерлерді ардақтайық» акциясы тек тұрмыстық көмек көрсетумен шектелмейді. Оның маңызды бөлігі – қарттардың жанында болып, әңгімесін тыңдау, өмір жолын кейінгі буынға таныту.

«Әділет партиясы» Жамбыл облыстық филиалы «Жастар Рухы» жастар қанаты төрағасының орынбасары Мерей Жолдасбек те бұл кездесудің жастар үшін маңызды болғанын атап өтті.

«Валентина апайға көмектесіп, үйіне қолғабыс ету үшін бардық. Бірақ өзіміз де көп нәрсе түйіп қайттық. Апайдың өмір жолы – сол кезеңдегі адамдардың қандай қиындықпен өмір сүргенін көрсетеді. Біз бүгін бейбіт заманда өмір сүріп жатырмыз. Ал осы тыныштықтың қадірін түсіну үшін өткенді білуіміз керек. Ардагерлердің әңгімесін тыңдау, батасын алу, олардың өмірін кейінгі ұрпаққа жеткізу – біздің міндетіміз. Бұл жұмыс бір акциямен аяқталмайды», — деді Мерей Жолдасбек.

Валентина апайға бүгін көп нәрсе керек емес. Жастардың үйіне келіп, жағдайын сұрағанының өзі көңіліне медеу.

Ал жастар үшін бұл – бір күндік кездесуден әлдеқайда маңызды. Себебі олардың алдында отырған 92 жастағы әжейдің өмірінде тұтас бір кезеңнің ізі бар.

Сондықтан «Ардагерлерді ардақтайық»: өткенге тағзым ғана емес, ұрпақтар арасындағы сабақтастықты сақтайтын жұмыс.

Соңғы екі айда акция аясында Жамбыл облысында 30-ға жуық ардагерге қолдау көрсетіліп, тұрмыстық мәселелерін шешуге көмек берілді. Бұл бағыттағы жұмыстар алдағы уақытта да жалғасады.

«Әділет» партиясы Жамбыл облыстық филиалының баспасөз қызметі