Жамбылда «Волонтер дәрігерлер қозғалысы» құрылды
Мемлекет басшысы Қасым-Жомарт Тоқаевтың бастамасымен 2020 жыл «Волонтер жылы» деп жарияланды. Президенттің қатысуымен «Birgemiz» атты республикалық Волонтерлер фронт-офисінің ашылу рәсімі өтті. Еріктілік қызметтің негізгі 6 басым бағытының ішінде медициналық волонтерлықты дамытуға арналған «Саулық» бағыты ерекше аталады.
Аталған бағытты жүзеге асыру аясында «Ғылыми-клиникалық кардиохирургия және трансплантология орталығының» жанынан облыс әкімдігінің жастар саясаты мәселелері басқармасының және аталған орталықтың бас дәрігері С.Жошыбаевтың қолдауымен «Волонтер дәрігерлер қозғалысы» құрылды.
Қозғалыс Жамбыл облысы тұрғындары арасында қан айналым жүйесі ауруларына қарсы күрестің 2020-2022 жылдарға арналған «Таза жүрек» бағдарламасын жүзеге асырмақ. Оның аясында ерікті дәрігерлер облыс тұрғындары арасында қан айналымы жүйесі ауруларын скринингтік зерттеу, оларды ерте анықтауға күш салмақ.
«Таза жүрек» бағдарламасынан бөлек волонтер дәрігерлер төмендегі жұмыстарды атқарады:
- Жүрек трансплантациясын қажет ететін созылмалы жүрек жеткіліксіздігі бар науқастармен жұмысты ұйымдастыру;
- Туа біткен жүрек ақауы бар науқас балаларды диспансерлеу жұмысын ұйымдастыру;
- Қауіп және ҚЖА факторлары бойынша халықты диспансерлеудің алдын алу жұмыстарын ұйымдастыру;
- Созылмалы жүрек жеткіліксіздігі бойынша халықаралық конференция өткізу бойынша жұмыстарды ұйымдастыру;
- Жүрекке ота жасалғанға дейін және кейін науқастарды жүргізуге көмек көрсетуді ұйымдастыру.